E faut pas min volé, y est pas kè dévoè pas vos u dire, d’ni sé pas, lo vieux m’lon jamé dê.
Y était tout dè sti flanc du Saimno, y était tout uto du lé u onke intrè Sevri et San Fariou.
P’têtre bin, d’nin sé pas d’plè. Pas mé kinta saison y était ! …
Mais tcheu de sli couté y avait un Incora qu’était ass brâve. Kè St-Pierre u St José. Pas malin pé dou sous alté pa facheu d’gogne, to l’tin contin ; é ronnave jamé et borlave onke moins et to l’monde l’âmâvon bien.
Pe bailli la parmichon dê travailli la dminjhe, pè fére gras lè dvindre, é dzivè jamé k’nan. Et, sute, kan é fallait s’confessâ p’les grandès fétès, é fassait bon fére altè pas corrieux..
Y était pas kmin kâkè michnéres k’sont corrieux k’min onna bellta. E vulont to savait, é vo tiront los pius d’la tête.
Onna coup k’vos étes dien l’confechnére, p’in sourti, y est jamé schamna, é vos étraillont pé k’les boyandires kan é font la boye.
Alo itiè, los corieux mischnéres é font lourde. E borlons é parlons te fo, et to s’le k’sont d’vant l’confeschnère écuton et intindon te, attant i ptâ su l’almanach Vermot ! … Cré nom, itiè é va plê ! …
E vaut mieux n’tron vieux Incora.
Al pas corrieux mé onco, al cheu, cheu k’mon topain.
Alo, avoé s’li z’itié, p’sè confessâ é va te solè, k’min on papi a mosique. E faut fére bujhi l’groin, armoi les potes k’min les vasches, kè ronmont e l’pourre schordré ké comprègnive rin, dzive, quand les potes s’arrétavont d’bujhi :
« y est bon, passe d’latre flanc » après avai bailla 2 Pater et 3 Avé pé pénitince et on bon coup d’absoluchon.
Mes braves jhins ! … Tout qu’vo voli d’plet ! …
Quand d’vo die, te l’monde âmâvè bien n’tron vieux Mr l’Incora ! … Te l’monde était contin ! … To ! …
Portant y a d’coup y était l’Incora, sin s’plaindre qu’fassait la pôte.
La dminjhe après la granda messe to los paroissiens éton modâ, les fennes à leu bronzin, los hommes u kâfé, l’Incora, to solè, contave los sous d’la kliète.
Oh ! .. d’pice y in avait preu, mé rinquè d’prin sous ! E fassè pas pesant ! … Suto qu’a sli timp, lo prin sous y était d’pice qu’étont parfia u mintin, avoé ou grou golet.
Quand d’vo die kien n’avait pas pesant !
E fallait ptâ d’couté lo sous qu’allâvon a l’Evèché, lo sous pè l’Eglyise lo sous p’les schandelles, lo sous p’los âmes du Purgatoère, lo sous plo mischnéres, lo sous d’on flanc…
lo sous d’latre, e restave juste on bocon d’peuffe, kakè prin sous a pinne p’aschtâ d’tabac a prizi p’la smanne, onco les preize fallait pas les férè trop grousses, atramin lè d’vindre la tabatire était ass’voéde konna bornale.
N’tron vieu Incora, s’est dzive :
« Mo paroissiens, s’le sacré « piche prin », faudra les sacoure onna mite », e sont preu larghe mais lamin larghe d’épaule ! … Uvri l’pourta monia pé fotre d’sous dien, e va preu, mé p’les sourti, ni compta pas …. »
La dminjhe après, l’Incora a fé on sarmon su la charitâ, vo povi mè craire, mieux kon Jésuite u tin d’carimme a Notre-Dame de Paris.
E faut savait, s’l’Incora, quand é volè, e prèjhive bien, y était onna « groussa sarvalle » apoé, avoé la linguè qu’armoivè preu ! …
Sti jhe a s’est dépatia dè schâmnâ la messe, p’alla compta lo sous d’la kliète.
Te comptâ, vo povi mè craire, lo sous, lo prin sous, pas ion d’plet qu’la dminjhe avant. S’li grand sarmon su la charita, rin, é serre a rin, pa mé kè pschi dien on violon p’lè férè rélâ ! …
L’brave Incora a schin qu’los nié l’font sarra les dins, l’bouschon la corgnule ! …
« S’le fotu schin, s’la binde d’cacassês é vulont rin intindre » s’est dzive l’pourre homme. Y a l’Incora qu’est scheu, mais s’la varna d’rauffian é s’bouschon les orlliès.
Mé dminjhe kvin, faudra les fotre onna grousse borlaison, faudra to lo arbatâ, Cré nom ! … Et va fére lourde, é vont m’intindre s’ti coup ! ..
Mais dou, trai jhe après, la colére était bomba, l’Incora s’est dzive :
Rin dire, y est tcheu, s’le regnafu, é s’foton d’mê …
On brave sarmon, é vulont pas comprindre !
Onna grousse borlaison ? Y est pas d’scheu ké fasse mieux ; a trop les sacoure s’le borrique sé armnyivont pas a la messe, é sarait onco pis …
A savait plé k’fére.
Onna véporna, qua paletave son corti, a pinsave a s’ké povè férè pé k’la kliètè saillè moins primme, kiè kakè grou sou non pas d’prin sous …
Mé kè férè ? …
Te pron coup, kmin on élouide ke l’passe p’la tête ! …
Noè ma fè … Vatia s’ké faut fére ! …
La kliète, yorre, y est les gosses los infants de chœur qu’la font, et bin y est mè kè d’la farè ..
Dépoé la chaire, avant l’sarmon al annonce to fo, un levin los brés :
« Ujhordui, y est l’Incora kva fére la kliète, d’min vé passa a couta vos ».
Après l’sarmon, a prin onna grande cavagne, bien iente, (é vaut mieux, on sâ jamé), kè d’mans dévotè ont recovrait d’onna drola nappe a dentelles.
Alo, to brossu, a passe dien to los bancs, d’vant to los hommes, totes les fennes in les arguettin to drai dien los jus, in s’arrettin a schakon et in fassin sagrola et snailli la cavagne d’vant leu groin.
Vo povi mè croire, y est la vréte vartâ, to l’monde, on pta la mandien la cavagne … Pas ion qu’a pas pta la man ! …
Ah ! l’Incora est contin, to contin. E pinse « Fére mé même la kliète y était onna bonna marouille ! … Fotus mâlabotia, d’vos é avu » … !
Ass, tellamin dépatia dé schmna la messe qu’a la oublia l’Pater ! …
Oh, après to … m … din dré deux d’man, é fara du méme …
La messe est schamna … Amen … Ite missae …
Vite, ala pas l’tin d’s’est désablyi, a renverse la cavagne su la trable. Oh ! sti coup on drai kia on moé d’sou. Portant a fourse d’comptâ. Le moé d’sous dévin décressu ! … et suto, pa onna groussa pice ! …
Et quand al a to compta, oh, doux Jésus, Marie, Josè, étou possible pas on sou d’plet ke l’atrè dminjhe mé pas on maltru sou d’plet.
Itiè, A dè s’achtâ, les schambes qu’est crulont, la tête qu’est vire, al a kmin onna pire dien l’estome, a s’est schin tot éboélâ ! …
Achta, al réstè longtin ! … la tête dien les doè mans …
Et tot pron coup a s’est rappalè in fassin la kliète qu’al a compta tote les jhins qu’éton a la messe. Et yorre, su la trable, y a moins d’pice. Kè d’participant a la messe. Et …… portant, to, to ‘ on pta la man dien la cavagne.
Alo sé dinse, y est tcheu, y in à kon pta la man, sin rin bailli ! …
N’tron vieux Incora, s’live to drai kmin Lucifer dien l’aigue bènète. Alta mêtia fou, lo 4 pieux to drai su la tête …. Nom de D …..Et su l’mu, juste d’van lui le pourre homme vè le Bon Diu su la Croê …
Oh ! doux jésus, pardon, faut pas m’in volè mé sti coup y est trop ! … d’en poè plet ! …
Ubin d’mode de s’la paroésse. Ubin d’les maille l’eau a s’le schins.
Rin bailli a la kliète, y est pas bien mais fére simblant et rin pta onna vergogne ; y est onna binde d’voyou, d’mintieu, d’sin keu é vâlon moins qu’on schin inradia ! …
Et l’malhéreu Incora, to solet kmin job a la corgnule sarrâ, kmin son l’avè invartollia l’cou avoé onna riute.
E pu rin bdie, rin bère, rin ké vu deschèdre, juste onna bonna râchon d’gotte, et dé tote la vé é n’pu pas fromâ los jus ! …
Sli jhe itiè a poé le lindeman altè tellamin effarollia k’al avait rin pu avalâ
D’vos é preu dê kè Mr l’Incora était un brave homme, sin rognafe, et ké kmin l’Evangile savè pardonna.
Dien la smanne, la colère était modà, et la dminjhe après al a fé son sarmon ! … Avant d’fére la kliète.
Dèpoé l’songeon d’la chaire, kmin l’pape su la lôghe d’St-Pierre, a dzivè :
Grand Diu d’lénau, d’si to heureux, to contin, grand marsi d’mavai pto dien s’la paroésse yeu y a rinkè d’braves jhins qu’ont bon keu.
Cré nom, vo m’intendi, vo m’écutâ tiè d’ze, vo dromsi ?
Quant d’vo diè, kè partiè, y a rinkè d’braves jhins, ass généreux kè St-Martin, ka bailla son manté ? »
Oh alo, itiè, tos los paroissiens s’est font gonfla l’pêtre, tcheu kiè vré, y est l’Incora kia dè.
E sont to fié ! …
L’Incora dit : y est vré dien la paroesse y a rinké d’braves jhins, dié preu viu dminjhe passâ kan dé fé la kliète, vo i to bailli kakrin, Grand marci à to ;
S’lo kon pas ballia onna pice et l’on fé s’ké povont élon ballia au moins … Le Golet.
Auteur de ce récit : Henri GURRET
Transciption : Monique LAMY