l'ours de Sevrier en patois
L'ORS DE SEVRI

 

Y a lontin de Sètié, Kan d'itou tô p tiou, avoé l'minton, lé zoê sin pieu, as prôpre kon ku d'botoye, lé piote as'grousse kmin d'alméttes, l'nâ béku, kórieu kmin onna bellta, d'itou plè éreu k' loz angés u paradis kan d'pevou mé m'éklia avoé los viêu du vlage, su los jhenoê d'mon gran'pâre.

S'los vieu, s'lé viyé s'aschtâvon a ron moé la d'minghe apré lo vépres, a l'ombre du grou pêri "blésson" kan é fassé schô u bin kontre la moraillè du gerni, u fêloê kan é fassê la bise. Alo itié é fasson marschi la lingue, d'vré barboti, êton su l'contiê d'leu joinnesse du bon viyeu tin.
Los vieu qu'la via avê étrailla du, éton respectâ et ékutâ q'min los métre. E n'avon pa étudia, mé é savon on moé d'chuze, mieux qu'lé grousses tétes apoé é l'avon to l'tin marschia drai. E vatia l'histoère qué racontavon d'ze l'grou pèri, in s'mâillin l'groin é in sarin les pôtes pè n'apa trop rire.
"Te l'énau u fin fon d'la comba d'Ire, a dou sin septante pis d'amo Deussâ, tô pré dés Bojhus, y'avè d'ien lo boê, to solet, on vieu célibatère, on ronnaré què n'été pa tro tarrible, kan alté ben véria, vèria, é valè mieux 'pa graklyi los artoets dè s'li balourien mème quant a fassè d'kupesses pè rire
O gran Diu d'lé no dé oublêya d'vo dire què s'la tétè d'boê qué, kan alté in colère, peussave del'le brammés à fare trimbla les vyilles pesses d'la Comba d'Ire. Y étè on ors on grous ors avoué ona groussa pio, d'griffes lonjhes qu'min ona trin-corbe, dê dins grousses qu'min los clious dé Baujhes.
Kan alté ptiou, n'tron bétian avé intendu dire, qué, loin ; lé dava su l'adrè du Semne, du flanc d'Sevri é yavé dè vgniè. Su lé cutes dè Schantamerle, bien vèria u felloê, é l'aschampschi los r'sin éton deu, ben secrâ, d'vré mié. Sé vo parlà d'mié a on ors, a devin a mètia fou !
"Mé lo hommes é vo mieu lé vére d'loin. Atan passâ p'los boé p'lé desroupiè, dré lêvé su lé pires, é vatia qué n'tron golu va pé l'col de Chérel, gambiote dien lo pra du Scharbon bambane dapoé Bornette, tant qu'à la Frasse et pè d'su Entreverne, s'infate p'la Cochette … arva itié ! …
Gran Diu … tout qu'a n'vé pa ! … Ouê ma fê ! la. Grévole l'monte tô drai lo p'lé piottes, lé schambes l'incrule ! … Juste itié ya on grou golet as larjhe qu'la métia d'ona maison, ass'ien qu'on poé, qu'los hommes on creusâ, p'lè caschi avoé d'rammes dè fajous de ptiou forgalons, dè foillie. S'li què pté lo piottes d'sus, al fotu, tô s'égnafe, et ona coup leba dze, rin a fare p'sin sourti !
Vo n'mê crayi pa, droles dames ou bau monchus, v'zètes qu'min San Thomas ? … Eh ben, monta léno schu la Cochette, à couté du vionnet, dze lé grousses pesses, vo vari l'golet a mêtia éboêla é vo porri y p'ta non pa lo dê, mé lé schambes.
Avoé la l'na d'abo travarsâ lo boê d'sant'Outaffiè, lé gargules du Laudon é no vatia su l'Semne é u sonjhon d'schapé d'Schantamerle. O y en on moé dè vgnès, los passés, los gorlions avoé leu foillies ! in o u ben rojhe. E y a onco les bênètes voèdes, totes prétes pé vindinjhi lè lindman.
N'tron golu core dien le vgniè mé al a bau r'géta, d'rzins pa ion ! Dien sa présse, al na pa viu qu'la vgnié ètè jha vindendia. E ronne, lé dins sarrâ, te brossu quant a vé on grou rzin un fin sonjhon d'onna gorlié. A corre l'groin ass'gran uvé, qu'onna pourte d'fê é to d'on coup, ingoâfe l'rzin.
Alo onna tarrible borlaison fâ seuta to los Sevriolains. E y a qué crayon que l'Semne raffe dien l'lé … portant é yè rin, é yè juste l'ors qué borle, a s'est égliapâ onna din, su on "conscrit jhèla"
Savivé s'qu'é yé qu'on conscrit ? E yé pas lo brâves, los jhoennes garçhons qu'on passâ la révijhon, é son te drus, é bombon l'pètre, é s'dreffent min lo pélatons ?
Nan ! vo n'y étes pas ! E y è lo rzins qu'sont pas meu ! Los vieux d'zivon : "Pavê ona bonna vindinjhe é faut qu'los rzins pindon p'la Mâdelinne, lo rzins qu'son pa peu pèsant, pè pindre p'lé 22 juillè, la Mâdelinne, é saron pa preu meu tro jhoenne p'la vindinjhe, é sara dé "conscrits".
Nion sâ qu'min.n'tron ors ê r'monta dien la comba d'Ire, mé yé d'cheu nion n'la jamé arviu ni parchu pè Sevri.
Pé é to drai, e fau vo dire, mo bons amis, qu'lo vieu m'on te l'tin dê a caschon, qué l'histore d'l'ors é rzins d'Sevri, quê y étè los ku sarâ, los grous boyus d'Inncy qu'la barbotave tant qué povon, vo savi, s'lo bagolus qu'sé dreffon l'cou, qu'étouille la corniule p'sèfare vère, s'lo penfus qu'sachton d'van ona trablie ben fornait, é assistes plinès l'e verres qu'on pa d'bidoyon u d'piquète
E vo mé dri, mé pèqué dan ? … pèqué ? … Mé é va to selè ! … Lo vin d'Schantamerle éton connius é ben démandà ! … y in a on moé qu'aron ben volu bêre "lé cutes d'san Martin", l'vin "d'la Sanflire" u dé "Ecolés", rin què d'in parla, los golus s'leschivon lé potes ! …
S'lé vgniès éton pa preu grandes pè fare d'vin p'to l'monde. Kan é fallè bêre, s'lo boyus d'la velle, e sin ingorzlave atan què dien ona maconnése, dix coups d'plé qu'ien avè. Alo, vo savi preu, kan on a pa s'qu'on vodrê, on tape d'su, on in dit d'mâ, on fâ d'grousses minteries.
Kan u bon vins d'Sevri, gran Diu, fau pa rire ! … Volive ona pruvè ? … Ona vraitè, .. k' min d'zivon los BOJHUS :
"Vête mes pôsches ! sé pa dè boè dé plane, què l'blan dé jus mè fondasse !" …
E ben, arguétâ ben, l'papi qu'on notére a escrit in 1730, on papi què nion puve allâ contre. Sli papi è dit "qu'lè vgnès d'Sevri vâlon ben mieux qu'los âtres", é los schanoennes d'Inncy, qu's'y consivont su l'vin, "é n'in volon pâ d'âtre".
A poé, d'sive onco mon gran pâre, kan é fassè bô tin, los monchus d'la velle v'gnivon p'Sevri avoé leu prinpioles d'fennes qu'marchivon pointu, é kan é rencontrâvon on tapa terre é l'arguétavon dè iau, é guingalovon la tétè, é l'groin in ku d'polaille é demandavon ? …
"Allons mon brave, n'aurais-tu pas une bonne bouteille de Mondeuse à nous vendre ?"
Mauvé l'vin d'Sevri ? … cré nom ! consivo d'grous monchus d'la velle qu'vulont bère d'vartellion ?

Henri GURRET